Saturday, April 4, 2020

கொரோனா கொடுமை - 1



படித்த அரசு அதிகாரிகளும் இப்படி இருந்தால் என்ன செய்வது?
சமீபத்தில் கொல்கத்தா, இங்கிலாந்திலிருந்து திரும்பிய, தனது முதல் கொரோனா தொற்று நோயாளியை உறுதிப்படுத்தியது. அவர் ஒரு உயர் அதிகாரியின் மகன்.
18 வயதான இந்த ஆக்சுபோர்டு பல்கலைக்கழக மாணவர் மார்ச் 15 அன்று இலண்டனில் இருந்து கொல்கத்தாவில் இருக்கும் தன் வீட்டிற்குத் திரும்பினார். சொந்த ஊருக்கு வருவதற்கு முந்தைய நாள் இரவு, தீன் என்ற இந்த இளைஞர், கொரோனா தொற்றினால் பாதிக்கப்பட்ட தனது இலண்டன் தோழர்களுடன் பார்ட்டியில் இருந்துள்ளார். இதனை உறுதி செய்துகொண்ட விமான நிலைய அதிகாரிகள் அவரை மருத்துவமனையில் சென்று சோதனை செய்யச் சொன்னார்கள். ஆனால் கவலை ஏதுமின்றி அவன் விதிமுறைகளையும் மீறியதோடு மேற்கு வங்காளத்தின் உயர்மட்ட அதிகாரியான அவரது தாயார் அருணிமா தேவிடம் சென்று சேர்ந்திருக்கிறார்.
இப்படியெல்லாம் அவர் சமூகத்துடன் கலந்து வாழ்க்கையைத் தொடர்ந்தார். அவர் 7 க்கும் மேற்பட்ட கேளிக்கை விருந்துகளில் பங்கேற்றார் என்றும் சிலர் கூறுகிறார்கள். அவர் தனது தாயை மேற்கு வங்க முதல்வர் அலுவலகத்திலும் சென்று சந்தித்திருக்கிறார்.
ஆனால் இதன்பின் கொரோனா தொற்றின் அறிகுறிகள் மோசமாகி, மார்ச் 16 அன்று தனது மகனை எம்.ஆர்.பங்கூர் மருத்துவமனைக்கு அழைத்துச் செல்கிறார் அம்மா.
ஆனால் மீண்டும் மகனை மருத்துவமனையில் அனுமதிக்க மறுத்து, அவரது தாயார் தனது செல்வாக்கைப் பயன்படுத்தி அதை விட்டு வெளியேறினார்.
இறுதியாக, மாநில சுகாதார நலத் துறை தலையிட்டு அவரை பெலகாட்டா ஐ டி மருத்துவமனையில் அனுமதிக்கும்படி கட்டாயப்படுத்தியது, அங்கு அவர் மார்ச் 17 அன்று கொரோனா தொற்றினால் பாதிக்கப்பட்டிருந்ததை உறுதி செய்யப்படுகிறார்.
இரண்டு நாட்களுக்குள் அவர் எத்தனை பேருக்கு தொற்றை பரவச் செய்திருக்கலாம் என்று கற்பனை செய்து பாருங்கள். இப்போது அவரது குடும்பம் அவர்களின் ஆடம்பரமான தெற்கு கொல்கத்தா வீட்டில் தனிமைப்படுத்தப்பட்டுள்ளது. இதில் அவரது ஏழை வாகன ஓட்டுனர்களும் அடக்கம் என்பது வேதனையான செய்தி. அதிகாரியான அருணிமா இந்த இடைப்பட்ட நேரத்தில் பல அரசாங்க கூட்டங்களிலும் கலந்துகொண்டுள்ளார்.
இந்த செய்தி வெளிச்சத்திற்கு வந்த பின்னர் மேற்கு வங்க செயலகத்தையே கிருமி நாசினியால் தூய்மை செய்ய வேண்டியிருந்துள்ளது.

Annu Kaushik
Journalist at WION (World Is One News) -

Wednesday, April 1, 2020

தமிழக முதல்வரின் எளிமையும், வலிமையும்






அவரவர் சுயம் வெளிப்படும் பேரிடர் காலம். இதுபோன்ற காலத்திலும் பேருக்கும், புகழுக்கும் அடிமையாகி போலி வேடதாரிகளாக அலைபவர்கள் ஒருபுறம். ஆதாயம் இல்லாமல் ஏன் சிரமப்பட வேண்டும் என்று அமைதியாக வேடிக்கைப் பார்க்கும் பிரபலங்கள் ஒருபுறம் என்று பல காட்சிகள் அரங்கேறும் வேளையில் நம் தமிழக முதல்வர் அமைதியாக, அச்சம் தவிர்த்து, தெளிவாக சிந்தித்து தேவையான தீர்வுகளை உடனுக்குடன் செய்ய முனைந்து அவைகளைச் சரியாகத் திட்டமிட்டு செயல்படவும் முனைகிறார். பெருந்தலைவர்கள் ஓமந்தூரார், காமராசர் போன்றவர்களுக்குப் பிறகு அவர் பாணியில் மிக இயல்பாக, முதலமைச்சர் என்ற முகமூடி இல்லாமல் மக்கள் தலைவராக, எளிய மக்களின் சிரமங்களையும் புரிந்துகொண்டு நாட்டு நிலையை அனுசரித்து சரியாகத் திட்டமிட்டு சுழன்று செயலாற்றுவதை பாராட்டாமல் இருக்க முடியாது. ஊடகவியலாளர்களின் குதர்க்கமான கேள்விகளுக்கும், மிக இயல்பாக நம் நாட்டின் நிலை பற்றி உங்களுக்குத் தெரியாததையா நான் சொல்லிவிடப் போகிறேன், இயன்றவரை சிறப்பாக செயல்படுவோம் என்ற வகையில் யதார்த்தமாகப் பதில் அளித்து வாயடைக்கச் செய்து எளிமையாக புரியவும் வைத்து நிலைமையை கட்டுக்குள் வைத்திருக்கிறார்.
கிட்டத்தட்ட 40 – 42 ஆண்டுகளுக்குப் பிறகு தமிழ் நாட்டில், 1800 கோடி உரூபாய் செலவில் அவிநாசி அத்திக்கடவு நீர் பாசனத் திட்டம், மேட்டூர் அணையின் உபரி நீரில்  560 கோடி செலவில் சிறப்பான பணித்திட்டம், கோவை, திருப்பூர், ஈரோடு, சேலம் போன்ற நான்கு மாவட்டங்களின் வறட்சியைப் போக்க உதவும் பசுமைத் திட்டம், தொலைநோக்கு பார்வையிலான செயல் திட்டங்களிலும் சிறப்பான முன்னெடுப்பு என குறுகிய காலங்களில் இவரது செயல் திட்டங்கள் பாராட்டிற்குரியது.


அமெரிக்க நாட்டின் சான் யூசே நகரில் நடைபெற்ற, 250-க்கும் மேற்பட்ட முதலீட்டாளர்கள் கலந்து கொண்ட கூட்டத்தில் தலைமையேற்று, தமிழ்நாட்டில் தொழில் தொடங்க ஆக்கமும், ஊக்கமும் அளிக்கப்படும் என உறுதி அளித்தார். இங்கிலாந்து நாட்டின் தலைநகரமான இலண்டன், அமெரிக்கா நகரில் தொழில் தொடர்பான பல்வேறு புரிந்துணர்வு ஒப்பந்தங்கள், இதைத்தொடர்ந்து நியூயார்க் நகரில் நடைபெற்ற முதலீட்டாளர்கள் கூட்டத்தில் கலந்து கொண்டு, அங்கு 16 நிறுவனங்களின் புரிந்துணர்வு ஒப்பந்தங்கள் ஏற்படுத்தியுள்ளார்.
இந்த வகையில் இந்த இக்கட்டான சூழ்நிலையையும் எதிர்கொண்டு சிறப்பாகச் செயல்பட்டு தமிழகத்தை மீட்டுக்கொண்டு வருவார் என்ற நம்பிக்கை வருகிறது.  பாராட்டை எதிர்பார்க்காமல் தன்னலமற்று, மக்களின் உணர்வுகளைப் புரிந்துகொண்டு செயல்படும் நம் முதல்வர் திரு எடப்பாடி பழனிச்சாமி அவர்களுக்கு பொதுமக்களாகிய நாம் ஒத்துழைப்பு வழங்க வேண்டியது நமது கடமை என்பதையும் நினைவில் கொள்வோம்.





Monday, March 30, 2020

பிறந்தநாள் வாழ்த்துகள்!




அன்பு மகன் செந்தில் குமாரின் இனிய பிறந்தநாள் இன்று. குழந்தைகள் எல்லாம் அக்கரையில் இருக்க, இக்கரையில் நாங்கள் நினைவுகளைச் சுமந்துகொண்டு இறையருளால் அனைத்து துன்பங்களும் தீர்ந்து அனைவரும் புத்துயிர் பெற்று இணைவோம் என்ற நம்பிக்கையுடன் அன்பு மகனை வாழ்த்துகிறோம். தங்களின் உளமார்ந்த வாழ்த்துகளும் அவர்களை நலமாக வாழவைக்கும் என்று நம்புகிறேன். வாழ்த்துங்கள் நண்பர்களே!  நன்றி.






வெற்றிவாகை சூடிவா  மகனே!
நம்பிக்கையோடு எதிர்கொள் சவால்களை
உலகின்  உன்னதங்கள் யாவையும் அதனூடே
மறையாய் மகோன்னதமாய் மலர்ந்திருக்கும்
சாகசங்களை மகிழ்வாய் கொண்டாடிவிடு சகோதரத்துடன்
பம்பரமாகச் சுழன்று வென்றுவிடு நல்மனங்களை

புன்னகை சூடியே புவியை ஆளலாம் 
இன்னல் விலக்கலாம் இதமான சொல்லால்
வள்ளல் ஆகலாம் வளமான செய்கையால்
இதயம் மலரலாம் மதியூகச் சிந்தையால்

கள்ளம் இல்லா உள்ளத்தோடு வலம்வரும்
கருணை பொங்கும் இதயத்தோடு நலம்நாடும்
என்றும் மானம் பெரிதெனும் தவத்தோடும்
உண்மை நெறியோடு வாழும் உறுதியுடனும்

நேயமெனும் சுடரேற்றி தூய்மையெனும் சுவாசமுடன்
நட்பெனும் கவசமுடன் பாசமெனும் பரவசத்துடன்
நித்தமும் நினைவோடு கனவிலும் நித்தியனை
பணிந்தேற்றி கடந்திடு இன்றைய சோதனையை.

நன்றே செய்கினும் நமச்சிவாயனின் பதம்பற்றி
தீதே விளையாதெனும் நம்பிக்கை ஒளியுடன்
பாரே போற்றும் நற்காரியங்களை நாளும்
நயந்து சிரமேற்கொளும் பண்புடனே வாழ்க!

உனதன்பெனும் தீராக்கடனை சுமப்பவள் நானடா!
துன்பம் யாவும் கதிரோனைக்கண்ட பனிபோல் விலக
வளமும் நலமும் பெற்று வாழ்க வாழ்க
தரணி போற்றும் தமிழும் அமிழ்தும் போல 
மங்கலமாய் மனைவி மக்களுடன் மங்காப்
புகழுடன் மாமனிதமாய் வாழ்க நீ பல்லாண்டு!!