சூழ்நிலைக் கைதி

வார்த்தைகளை கொஞ்சம் பக்குவமாகப் பயன்படுத்தியிருந்தால்

இவ்வளவு பெரிய துன்பச் சூழலில் சிக்கியிருக்க மாட்டேன்

சற்றே பொறுத்திரு எனும் மந்திர வார்த்தையால்

சூழ்நிலையைப் புரிய வைத்திருந்தால் ஆதீத கற்பனையால்

இவ்வளவு அதிர்ச்சியடைந்திருக்க மாட்டேன்

ஒரு சிறிய விளக்கம் கொடுத்திருந்தால் தூக்கம் கெட்டு

குருதி கொதித்து மருத்துவமனை வரை வந்திருக்க மாட்டேன்

எப்படியும் எதையும் ஏற்றுக்கொள்ளும் மனநிலையில் இருப்பது

தெரிந்தும் இத்தனை கடினமான வார்த்தைப் பிரயோகத்தைத்

தவிர்த்திருந்தால் சுயபச்சாதாபத்திற்கு ஆளாகாமல் இருந்திருப்பேன்

மழை வெள்ளத்தில் அடித்துச் செல்லும்போது தற்காப்பிற்கு

ஒரு மரத்துண்டாவது சிக்காமலா போகும்

சமாதானத்திற்காக ஒரு துரும்பைக் கூட கிள்ளிப்போடாமல்

அதீத அமைதி காப்பதில் என்ன அர்த்தம் இருக்கிறது?

- பவளா