கழுகும் – சிறுமியும்
அதீத மகிழ்ச்சி கூட
சில சமயங்களில் பெரிய தண்டனையாக மாறலாம். அப்போது தாம் மகிழ்ச்சியாக
இருக்க தகுதியற்றவர் என்று உணரும் நாட்களும் வரலாம்.
ஊடகவியல், இணைய
ஊடகவியல், இலக்கியம், இசையமைப்பு போன்ற
துறைகளுக்காக ஐக்கிய அமெரிக்காவில் வழங்கப்படும் மிக உயரிய
விருதுதான் புலிட்சர் பரிசு. இவ்விருது
நியூ யார்க் நகரத்தில், கொலம்பியா
பல்கலைக்கழகத்தால் வழங்கப்பட்டு வருகிறது.
1994-ம் ஆண்டில் தன்னுடைய சிறப்பான புகைப்படத்திற்காக,
கெவின் கார்ட்டர் என்பவர் புலிட்சர் பரிசைப் பெற்றார். தி வல்ச்சர் அண்ட் தி லிட்டில்
கேர்ள் (The Vulture and the little girl – கழுகும் சிறுமியும்) என்ற அந்த புகைப்படம்
அனைத்துப் படங்களிலும் மிகச்சிறப்பான ஒன்றாக தேர்ந்தெடுக்கப்பட்டது.
சூடான் நாட்டின் அப்போதைய சூழ்நிலையை மையப்படுத்தி
எடுத்த இந்த புகைப்படம் மார்ச் 26, 1993 அன்று தி நியூயார்க் டைம்ஸ் இதழில் வெளிவந்தது.
பட்டினியால் மிகவும் பலவீனமாகி இருந்த எலும்பும், தோலுமாக மெலிந்து நடக்க முடியாமல்
சுருண்டு கிடந்த ஒரு பெண் குழந்தை ஐக்கிய நாடுகள் சபையின் உணவு வழங்கும் மையத்தை அடைவதற்கு
போராடிக் கொண்டிருந்த அந்த குழந்தையின் பின்னால் ஒரு கழுகு, அந்தக் குழந்தை இறந்து
விழுந்தால் உணவாக்கிக் கொள்ளலாம் என்று காத்துக் கொண்டிருக்கிறது. இந்த சிறப்புப் படத்திற்கான
புலிட்சர் பரிசை 1994இல் பெற்றார். ஆனால் அந்த மகிழ்ச்சி வெகு நாட்களுக்கு நிலைக்கவில்லை.
கடுமையான விமர்சனத்திற்கு உள்ளான அந்தப்
படத்தினால் பலர் அவரை கண்டிக்க ஆரம்பித்தனர். அந்தக் குழந்தைக்கு உதவுவதற்குப் பதிலாக
இப்படி படம் எடுத்து புகழ் சேர்த்ததை மிக மோசமாக விமர்சித்தனர். மனம் நொந்து போன கார்டர்,
அதிகமான மன உளைச்சலுக்கு ஆளானவர் அதிர்ச்சியும், குற்ற உணர்ச்சியின் காரணமாகவும் நான்கு
மாதங்களில் தற்கொலை செய்து இறந்து போனார்.
இன்றும் விபத்து நடக்கும் இடங்களில் உயிருக்குப்
போராடும் ஒருவரை காப்பாற்றுவதைக் காட்டிலும் அதை படம் பிடித்து வெளியிடுவதில் அதிகக்
குறியாக இருப்பவர்களைத்தான் அதிகமாகக் காண முடிகிறது.
